කින්නියා කුරුඤ්ඤන්කේනි පාලම මාස 09ක් ඇතුළත
“සෞභාග්‍යයේ දැක්ම” ප්‍රතිපත්ති ප්‍රකාශනයෙන් ජනාධිපති ගෝඨාභය රාජපක්ෂ මැතිතුමා ජනතාවට දුන් පොරොන්දු ප්‍රකාරව සියලුම මාර්ග නියමිත කාලයට සංවර්ධනය කිරීමට පියවර ගන්නා බව මහාමාර්ග අමාත්‍යාංශයේ ලේකම් ආර්.ඩබ්.ආර්. පේමසිරි මහතා පවසනවා.
දිවයිනේ සියලුම අතුරු මාර්ග හා ප්‍රවේශ මාර්ග සංවර්ධනය කොට ප්‍රධාන මාර්ග පද්ධතිය හා සම්බන්ධ කිරීම කඩිනම් කර ඇති බවයි ලේකම්වරයා කියා සිටියේ .
“ශ්‍රී ලංකාවේ මාර්ග පද්ධතිය ගැන අලුත්ම තොරතුරු” යන මැයෙන් අද (25) පෙරවරුවේ ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ජාවට එක්වෙමින් ලේකම්වරයා මේ බව ප්‍රකාශ කළා.
ජනතාව ඉමහත් උනන්දුවකින් බලා සිටින මධ්‍යම අධීවේගී මාර්ගයේ මීරිගම සිට කුරුණෑගල දක්වා කිලෝමීටර් 41කින් සමන්විත කොටස නුදුරේදීම ජනතා අයිතියට පත්වන බවත්, කොවිඩ් වසංගතය හමුවේ දැඩි කැපවීමකින් උදාකරගත් එම අවස්ථාව විශාල ජයග්‍රහණයක් බවත් ලේකම්වරයා පෙන්වා දෙනවා.
වසර 2024 වන විට මධ්‍යම අධිවේගී මාර්ගයේ සංවර්ධන කටයුතු සම්පූර්ණ කිරීමට හැකි වන බවයි ඒ මහතා කියා සිටින්නේ.
මාර්ග සංවර්ධනයේ දී අදාළ ප්‍රසම්පාදන ක්‍රියාවලිය අන්තර්ජාතික නියමයන්ට අනුව සිදු කෙරන අතර ඉදිකිරීම් වලදී ද ජාත්‍යන්තර ප්‍රමිතිය ආරක්ෂා කරගැනීම සඳහා ඉදිකිරීම් හා පුහුණු කිරීම් ආයතනය නියම කළ තාක්ෂණික පිරිවිතරයන්ට අනුව ම කටයුතු කරන බව ද පේමසිරි මහතා සඳහන් කළා.
කොළඹ නගරයේ මාර්ග තදබදයට හේතු වන ප්‍රධාන මංසන්ධි සියල්ල පුළුල් කර, නවීන තාක්ෂණයෙන් යුත් ආලෝක සංඥා පද්ධති සවි කිරීමට සැලසුම් කර තිබෙනවා.
භෞතික අවහිරතා ඇති ස්ථානවල ගුවන් පාලම් වැනි විකල්ප ක්‍රම භාවිතා කරමින් මාර්ග තදබදයට විසඳුම් ලබාදීමට සැලසුම් කර ඇති බවත් ප්‍රධාන නගර ආශ්‍රිතව විකල්ප මාර්ග ඉදිකිරීමට ද යෝජනා කර ඇති බවත් ලේකම්වරයා ප්‍රකාශ කළා.
කොළඹ – පුත්තලම ප්‍රධාන මාර්ගය සංවර්ධනය කිරීමට සැලසුම් කර ඇති අතර එහිදී හලාවත නගරයට සහ මාර්ග කොටසට වැසි ජලයෙන් වන බලපෑම වළක්වා ගැනීමට ද සැලසුම් සකස් කර තිබෙනවා.
ජල, විදුලි, ටෙලිකොම් වැනි සංවර්ධන ව්‍යාපෘති ක්‍රියාත්මක කිරීමේදී නිම කරන ලද මාර්ගයන්ට වන හානි අවම කරගැනීමට මෙතෙක් පැවති ක්‍රමවේදයට බාහිරව මාර්ග සංවර්ධන අධිකාරිය අදාළ ආයතන සමග අන්තර් සම්බන්ධතා පවත්වා ගනිමින් සැලසුම් සාකච්ඡා කිරීමට පියවර ගෙන ඇති බවද සඳහන්.
ඒ අනුව අනිකුත් ආයතන ක්‍රියාත්මක කරන සංවර්ධන ව්‍යාපෘතිවලදී යොදාගත හැකි ආකාරයට මාර්ග දෙපස මීටර් දෙක බැගින් වපසරියක් වෙන් කෙරෙන බව මාර්ග සංවර්ධන අධිකාරියේ අධ්‍යක්ෂ ජනරාල් සර්ධා වීරකෝන් මහතා කියා සිටියා.
ත්‍රිකුණාමලය කින්නියා, කුරුඤ්ඤන්කේනි කළපුවේ පාලම් පාරුවක් පෙරළි යාමෙන් පාසල් දරුවන් ඇතුළු හයදෙනෙකු ජීවිතක්ෂයට පත් වූ සිද්ධිය දැඩි සංවේගයට හේතුවක් බව පැවසූ ලේකම්වරයා මාර්ග සංවර්ධනය අධිකාරියට අයත් නොවූව ද ජනාධිපති ගෝඨාභය රාජපක්ෂ මැතිතුමාගේ උපදෙස් පරිදි කුරුඤ්ඤන්කේනි පාලම මාස නවයක් ඇතුළත ඉදිකිරීමට උපදෙස් දුන් බව ද ප්‍රකාශ කළා.