fbpx
නාපානේ පේමසිරි මහ නා හිමියන්ගේ ධර්ම ඥාණය, සිල්වත්කම, ගුණවත්කම සමාජයට ආශිර්වාදයක් සහ ආදර්ශයක් – ජනපති

නාපානේ පේමසිරි මහ නා හිමියන්ගේ ධර්ම ඥාණය, සිල්වත්කම, ගුණවත්කම සමාජයට ආශිර්වාදයක් සහ ආදර්ශයක් – ජනපති

ශ්‍රී ලංකා රාමඤ්ඤ මහා නිකායේ මහානායක අතිපූජ්‍ය නාපාන පේමසිරි නා හිමියන්ගේ ධර්ම ඥාණය, සිල්වත්කම සහ ගුණවත්කම සමාජයට ආශිර්වාදයක් සහ ආදර්ශයක් වූ බව ජනාධිපති ගෝඨාභය රාජපක්ෂ මහතා පවසනවා.

උන්වහන්සේ අපවත්වීම සම්බුද්ධ ශාසනයට, රටට, සමස්ත ලෝක බෞද්ධ ජනතාවට මෙන්ම පෞද්ගලිකව තමාට ද පිරිමැසීමට අපහසු පාඩුවක් බවයි ජනාධිපතිවරයා සඳහන් කලේ.

අද පස්වරුවේ මහනුවර, කුණ්ඩසාලේ, එස්.ඩබ්ලිව්.ආර්.ඩී. බණ්ඩාරනායක ජාතික පාසල් ක්‍රීඩාංගණයේ පැවති ශ්‍රි ලංකා රාමඤ්ඤ මහා නිකායේ මහා නායක, හුරීකඩුව, මැණික්හින්න විද්‍යාසාගර පරිවෙනාධිපති අග්ගමහා පණ්ඩිත අතිපූජ්‍ය නාපාන පේමසිරි නා හිමිපාණන් වහන්සේගේ ආදාහන පූජෝත්සවය අමතමින් රාජපක්ෂ මැතිතුමා මේ බව සඳහන් කළා.

ආදාහන පුජෝත්සව භූමියට පැමිණි ජනාධිපතිතුමා අතිපූජ්‍ය නාපාන පේමසිරි නා හිමියන්ගේ ශ්‍රී දේහයට වැද නමස්කාර කර අවසන් ගෞරව දැක්වූවා.

1922 නොවැම්බර් 30 වන දින මහනුවර නාපාන ග්‍රාමයේ දී උපත ලැබූ උන්වහන්සේ අපවත්වන විට අනු අට වන වියෙහි පසුවූහ.

1933 වසරේ දී පැවැදි දිවියට පිවිසි උන්වහන්සේ 1943 වසරේදී උපසම්පදාව ලැබූහ.

ලොව කීර්තිධර මහා තෙරුන්වහන්සේට බුරුම රජය පිරිනමන “අග්ගමහා පණ්ඩිත” සම්මානයෙන් පිදුම් ලැබූ උන්වහන්සේ 2012 වසරේ දී ශ්‍රි ලංකා රාමඤ්ඤ මහා නිකායේ මහා නායක පදවියට පත්ව අපවත්වන තුරුම එය හෙබවූහ.

බුදු දහමෙහි ගැබ්ව ඇති ගැඹුරු දර්ශනය සමාජගත කරමින් ඊට අනන්‍ය වූ සංස්කෘතියක් ගොඩනැගීමට මහා සංඝරත්නය ඉටු කළ මෙහෙය අතිමහත් බව ජනාධිපතිතුමා සඳහන් කළා.

බුදු දහමත්, සංස්කෘතියත්, සිංහල ජාතියත් රැකගෙන මෙරට වෙසෙන සෙසු සියලු ජාතීන් සමග සහජීවනයෙන් කටයුතු කිරීමට මහා සංඝරත්නය දෙන දායකත්වය ඉමහත් බව ද ජනාධිපතිතුමා ප්‍රකාශ කළා.

Share This